<--Matariki: Te noho tahi me Tākuta Rangi Matamua
I ngā rā o mua whai ai ngā tūpuna Māori i ngā āhuatanga o te marama hei tohu i te wā. Koinei te maramataka e tohu ana i ngā āhuatanga o te taiao. He pānga tō te marama ki ngā tai o Tangaroa, o Hinemoana. E ai ki te kōrero he pānga hoki ki ngā whanonga tangata, ōna kare ā-roto, ōna piropiro. Nā whai anō ka puta mai ngā kōrero mō te tangata wuruhi i te ao Pākehā. Ko te kupu ‘lunatic, arā ko te pōrangi, i ahu mai i te kupu ‘lunar' ,ā, e hāngai ana ki te marama.
Ngā mata o te marama ©Living by the Stars
He poto iho te tau o te maramataka Māori ki tā te maramataka Pākehā e mōhiotia nei e te nuinga o tātou.
E 365 ngā rā o te maramataka Pākehā, e 354 kē ngā rā o te maramataka Māori.
Nō reira i ia toru tau ka tāpirihia tētahi marama anō ki te maramataka Māori kia hāngai tonu ki te hurihanga tau, ki tā te kitenga i a Matariki.
Kāore i whakanuia a Matariki e ngā tūpuna i te wā ōrite i ia tau. Ko te āhua o te marama i tohu ai i te wā tika. Ākene pea ka rewa ake a Matariki i te marama o Haratua, o Pipiri, o Hōngongoi rānei.
Ko tā ngā tūpuna whai mōhiotanga mō te wā he kite i te wāhi e noho ana a Tamanuiterā i te rangi hei tohu i te kaupeka, arā te wāhanga o te tau. Ko te aranga o ngā whetū i te atapō e tohu ana i te marama o te tau. Ko ngā mata o te marama i te rangi e tohu ana i te rā, i te pō rānei.
Waiata - Ngā marama o te tau Māori
Waiata - Ngā marama o te tau Māori
Ka waiata a Tākuta Rangi Mātāmua mō ngā marama o te tau. Ko ngā ringaringa hei ine i te nohonga o ngā whetū i te rangi kia mōhio ai ki te wāhanga o te tau
Te Tahi o Pipiri
Te Rua o Takurua
Te Toru Here o Pipiri
Te Whā o Mahuru
Te Rima o Kōpū
Te Ono o Whitiānaunau e
Te Whitu o Hakihea
Te Waru o Rehua
Te Iwa o Rūhī
Te ngahuru o Poutūterangi
Te ngahuru-mā-tahi o Paengawhāwhā
Te ngahuru-mā-rua o Haki Haratua
(2x)
Te Tahi o Pipiri
Tahi wehewehe
Ruhanui
Te tau toru nui o Matariki e
© Rangi Matamua 2021.
Te Tau Nui o Matariki ©Living by the Stars
E whakaatu ana tēnei whakaahua i ngā marama o te maramataka Māori me te hononga ki ngā nekehanga o ngā whetū. Ka tohua ia marama e ngā whetū e mahuta ai i te atapō o Whiro. Ka tāpirihia a Ruhanui i te Hōtoke o te tau tuatoru i te maramataka Te Tau Toru Nui o Matariki.
Te panonitanga o ngā rangi
Ka kōrero a Jamie ki a Tākuta Rangi Matamua mō te take ka panonitia ngā rā o Matariki i ia tau:
Ngā rā o te wiki
He ingoa o te maramataka Māori mō ia rā/pō e hāngai ana ki ngā mata o te marama. Kei te takiwā o te 29 ki te 30 ngā rā o te marama. Hāunga te Rātapu me te Rāhoroi, ko ngā ingoa o ngā rā o te wiki e mōhio nei tātou i ahu mai ai i ingoa o ngā atua me ngā aorangi Pākehā, arā ko te ‘Mon’ he kupu anō mō ‘Moon’ koirā i tapaina ko Monday. He mea whakamāori e Te Taura Whiri i te Reo Māori a Rāhina, arā ko ‘hina’ tētahi kupu mō te marama. Ko Tuesday ka whai i te atua o ngā pakanga arā ko ‘Tiu (o ngā tangata Germanic) ’ ko ‘Mars’ (o ngā tangata Roman) rānei. Ko Tūmātauenga te atua Māori mō te pakanga - nā reira i Rātū ai a Tuesday.
Māu pea hei rapu i ngā kōrero pēnei mō ērā atu rā o te wiki.
Kōkōrangi Māori- Kupu akiaki
He kōrero akiaki ā Tākuta Rangi Matamua mā te hunga e hiakai ana ki te whai i te huarahi mātai arorangi:
Rerenga kōrero
| Ngā marama | Ngā marama |
| Te Rua o Takurua | Hurae/Hōngongoi |
| Te Toru Here o Pipiri | Ākuhata/Hereturikōkā |
| Te Rima o Kōpū | Oketopa/Whiringa-ā-nuku |
| Te Ono o Whitiānaunau e | Noema/Whiringa-ā-rangi |
| Te Waru o Rehua | Hānuere/Kohitātea |
| Te Iwa o Rūhī | Pēpuere/Huitanguru |
